Бүгін Парламент Мәжілісі «Мемлекеттік монополия туралы» ҚР заңының жобасын мақұлдады. Табиғи монополияларды реттеу және бәсекелестікті қорғау агенттігінің төрағасы Бақытжан Сағынтаевтың айтуынша, аталмыш құжат мемлекеттік монополия саласындағы қоғамдық қатынастарды реттейді және тұтынушылардың құқығын қорғайды, деп хабарлайды ҚазАқпарат.
«Заң жобасына сәйкес, мемлекеттік монополия - ұлттық қауіпсіздік, қоғамдық тәртіп, адам құқықтары мен бостандықтарын қорғау және халықтың денсаулығын сақтау тұрғысынан бәсекелестікті енгізу орынсыз саналатын қызмет түрі болып табылады. Құжатта осы саланы түбегейлі анықтау мен реттеу, сондай-ақ олардың аражігін ажырату мәселелері қамтылған», деді Б. Сағынтаев. Оның сөзіне қарағанда, мемлекеттік монополия субъектілерін тиісті тізілімге енгізіп, мониторингтеу қажет. Сонымен қатар заң жобасы бойынша осы саладағы көрсетілетін қызметтерді пайдаланатын жеке және заңды тұлғалардың құқықтары мен міндеттері айқындалмақ.
Тұтастай алғанда аталмыш құжат мемлекеттік монополия қызметтерін бақылау мен реттеудің құқықтық негіздерін жетілдіруге бағытталған. Мәжіліс комитеттері заң жобасына оң қорытынды берді. Палата депутаттары құжатты мақұлдап, оны Сенаттың қарауына жіберді.АСТАНА. Қарашаның 2-сі. ҚазАқпарат
