Бүгін Қазақстан Республикасы Табиғи монополияларды реттеу агенттігінде Қазақстан халықтарының тілдері күніне үстіміздегі жылғы қыркүйектің 17 - 25 аралығында салалық Департаменттер арасында өткізілген қорытынды конкурс өтті. Конкурс төрт кезеңнен тұрды: тақырыпқа байланысты әңгімені дайындап айтып беру (жеребе бойынша), іскерлік қағаздарды толтыру, тапқырлық пен жылдамдыққа байланысты ойын, мәтінді орыс тілінен қазақ тіліне аудару. Бағалау өлшемдері: тақырыпты толық ашып айту, қазақ тілінде дұрыс баяндау, құжаттарды мемлекеттік тілде сауатты толтыру, қысқа мерзімде жаңа сөздерді құрастыру, қазақ тіліндегі граматикалық және стилистикалық нормалардың сақталуын байқау.
Қорытынды конкурсқа қатысушылар «Менің департаментім» тақырыбы бойынша үй жұмысын ұсынды. Онда тақырыптың ерекше ашылуы ескерілді.
Департаменттерден қатысушылар арасындағы іріктеу кезеңінің жеңімпаздары :
1 орын - Балгереева Гүлнар - Әкімшілік жұмысы және талдау департаменті;
2 орын - Баймаханова Гауһар - Телекоммуникациялар және аэронавигация саласындағы реттеу мен бақылау департаменті;
3 орын – Ғомарова Назерке - Электр және жылу энергетикасы саласындағы реттеу мен бақылау департаменті болып танылды.
Жеңімпаздар «Құрмет грамотамен», сондай-ақ бағалы сыйлықтармен марапатталды.
Әділқазылар алқасы Т.Ә. Қорғанбекованы (Телекоммуникациялар және аэронавигация саласындағы реттеу мен бақылау департаменті), С.П. Науменконы (Заң департаменті), Ә.М. Мұханованы (Әкімшілік жұмысы және талдау департаменті) қазақ тілін жетік меңгергені, конкурсқа белсенді қатысқан үшін ерекше атап өтті.
Конкурсты өткізу мақсаты: мемлекеттік тіл саясатын насихаттау, қазақ тілі аясын кеңейту, күнделікті атқарылатын жұмыста іс жүргізуде қолдану, мемлекеттік тілді оқыту барысында қызығушылықты арттыру болып табылады.
Конкурсты ұйымдастырған Әкімшілік жұмысы және талдау департаментінің Әкімшілік жұмысы басқармасы мемлекеттік тілді дамыту бөлімі.
